Program for Vossa Jazz

22. – 24. MARS

Her kan du sjå programmet til Vossa Jazz 2024!

    fredag 22. mars

    laurdag 23. mars

    • Griegakademiet

      Innovasjon, energi og speleglede er stikkord når Jazzlinja på Griegakademiet i Bergen inviterer til konsert i foajeen i Gamlekinoen!

      laurdag 23. mars

      11:30

    • Superjazz: SuperLydvo med Supergruppo

      Improvisasjon, dans og kanskje besøk av sjølvaste Elvis? Dette er berre toppen av det musikalske isfjellet som Supergruppo og SuperLYDvo byr på under årets Superjazz!

      laurdag 23. mars

      12:00

    • Air Play

      Som dei sjølv seier: Air Play er fellesskap, samspel, improvisasjon, klang og magi i melodi - i felles rytmikk og uttrykk. Det er berre å gle seg.

    • Badnajazz: Under Bakken

      “Under Bakken” er slåande vakker, morosam og rar - ei musikalsk og visuell framsyning om det yrande og livsviktige universet som me har rett under føtene våre heile tida, i den mørke, brune jorda under bakken!

      laurdag 23. mars

      13:00

    • Randi Pontoppidan -solo

      Randi Pontoppidan er kjend for vokalarbeidet sitt, og kanskje spesielt for hennar eksperimentelle elektroniske livehandsaming av stemma. Ho har ein bakgrunn frå både jazz og klassisk song, og nyttar ei blanding av desse stilartane til å skapa musikk utanfor sjangerrammene. Ho skaper eit elektroakustisk lydunivers som ikkje liknar noko anna, og som dreg publikum med seg, kvar enn det bevegar seg. 

      laurdag 23. mars

      14:00

    • Johan Hauknes i samtale med tingingsverkkomponist Hanna Paulsberg

      Johan Hauknes, jazzskribent i salt peanuts* og jazzvitar, snakkar i ein times tid med Hanna Paulsberg om årets Tingingsverk. Ho vil seinare i kveld framføre sitt nyskrivne verk Do you want my job? Vi vil høyre kva hennar tanker omkring tingingsverket er, og kven den fiktive cowboyen som spør, er. Kanskje har òg tilveret som turnerande musikar nokre likskapstrekk med tilveret som cowboy på prærien?

      laurdag 23. mars

      14:00

    • BOI AKIH

      Duoen består av komponist og gitarist Niels Brouwer og vokalist Monika Akihary. Akihary er ein av Europa sine leiande vokalistar, og fekk Boy Edgar prisen i 2023, den fremste prisen for jazz og improvisert musikk i Nederland. 

    • Susanne Lundeng solo

      Med virtuost felespel og eit uttrykksfullt scenisk nærvær kjem Susanne Lundeng tilbake til Voss. Denne gongen som soloartist. Med seg i bagasjen har ho den nordnorske folkesjela.

      laurdag 23. mars

      16:00

    • William Parker Trio «Mayan Space Station»

      William Parker Trio “hentar like mykje frå hardrock og psykedelia, som frå blues- og jazztradisjonen”, ifølge All About Jazz. Dei skildrar trioen sitt album “Mayan Space Station” med eitt ord: Svidd.

    • Vepsestikk

      Vepsestikk kokar opp eit makelaust heksebrygg så potent at det får deg “til å bevega dansefoten i edru tilstand”, ifølgje Universitas. 

      laurdag 23. mars

      16:30

    • Tingingsverket – Hanna Paulsberg «Do you want my job?»

      I årets Tingingsverk “Do you want my job?” vil Hanna Paulsberg mana fram ein fiktiv cowboy, og spela fram musikken som følger han.

    • Shamania

      Blandar du jazz-orkester og musikkteater med nokre av dei sterkaste musikarane i Skandinavia, ja, då får du Marylin Mazur’s Shamania.

      laurdag 23. mars

      20:00

    • «Hundemanuskripta» av Jon Fosse

      Jon Fosse, den fyrste nynorskspråklege forfattaren som har vorte tildelt Nobels litteraturpris, skriv i kjend stil djupt menneskelege tekstar, også sett frå hundekorga.

      laurdag 23. mars

      20:00

    • Mirror Image

      Mirror Image er ein eklektisk og mangslungen oktett, handplukka av bassist Ole Morten Vågan for berre eit par år sidan. Dei ferske komposisjonane er det Vågan som står bak, men ensemblet inkorporerer gjerne sørafrikanske hits frå 70-talet, inspirasjon frå samtidsmusikk, og element frå afrikansk folkemusikk – i tillegg til jazz i alle moglege former. Ein veit altså aldri kva denne gjengen kan finna på å byda på, og det er nett slik me likar det! Denne konserten er inkludert i billetten Huskort laurdag.

    • DJ Bård Berg

      Bak snurrande plater, i mørke rom, omringa av dansande, sveitte menneskje finn du Bård Berg. Denne konserten er inkludert i billetten Huskort laurdag.

    • Nelly Moar

      Det er herleg sutlaust når Nelly Moar inviterer deg inn i eit dansbart, sjølvsikkert og silkemjukt univers. Den bergensbaserte artisten kombinerer R&B, Club og Pop, og nyttar seg av inspirasjonskjelder som KAYTRANADA, Erykah Badu, D’Angelo og Jorja Smith. Ho har ei stemme med uvanleg god rekkevidde, og har allereie vorte ei me gler oss til å høyra meir av! Denne konserten er inkludert i billetten Huskort laurdag.

    • Jamvert: Ole Mofjell & 3 Days of Maceation

      Ole Mofjell & 3 Days of Maceration er ein levande jazztrio, full av humor og kompleksitet. Dei baserer seg på dei store jazzkomponistane frå 60- og 70-talet, som Charles Lloyd, Ornette Coleman og Anthony Braxton, og vidarefører denne tradisjonen i ei moderne tid. Denne konserten er inkludert i billetten Huskort laurdag.

      laurdag 23. mars

      22:30

    • Horse Orchestra

      “Eit festband som med framføringane sine nesten negerer skandinavar sitt rykte for å mangla humor.”, skriv Jazzword.com. Denne konserten er inkludert i billetten Huskort laurdag.

    • OJKOS m/ Knut Kvifte Nesheim «Graosido»

      Verket “Graosido” er inspirert av eit fjellmassiv som Vossingar kjenner godt, der musikken målar fram landskapet i skiftande ver og årstider. Komposisjonane har naturleg nok fått titlar “pao vossamaol”, og ein kan mellom anna høyra lyden av “Vadlasletta”, “Taoe” og “Tjødni”. 

      laurdag 23. mars

      23:00

    • Best Western Swing

      Det må jo bli medrivande når fem musikarar let seg foreina i kjærleiken sin til musikk som dette. Best Western Swing omtalar det sjølv som “western swing, hestejazz, bææ-bop og andre rurale uttrykk for jazzifisert dansemusikk frå dei amerikanske sørstatane”. Denne konserten er inkludert i billetten Huskort laurdag.

    sundag 24. mars

    • Litteraturfrukost med Kjartan Fløgstad og Ole Morten Vågan

      Start dagen med ein litterær frukost på Café Stationen saman med Kjartan Fløgstad, tonesett av den eminente Ole Morten Vågan. Det vert ein enkel frukostbuffet, som supplement til den andelege føda.

    • Jazznytt18

      I nokon år no har me hatt besøk her på Vossa Jazz av samtaleklubben Jazznytt18, der programleiar Audun Vinger møter musikarar, forfattarar og andre festivalfolk for morosame, inspirerande og vonleg […]

    • Karja/Renard/Wandinger

      I Osasalen skal improvisasjonar inspirerte av øydelagde maskinar og gamle, nifse stumfilmar krypa inn under huda på publikum. Hakkete og støytvise rytmar vert etterfølgde av rolege parti som snor seg fram mot brå brak og ustyrlege musikalske utfaldingar. Når trioen Karja/Renard/Wandinger spelar i Osasalen, kan me ikkje sjå for oss anna enn at det vil lyda heilt ned til Vangsvatnet!

    • Aruán Ortiz & Rob Waring Concert Tribute «Til Grete»

      “Lat oss spela inn eit album”, sa Aruán. “Ja, og la oss reisa verda rundt”, svarte Grete. “Fyrst må me spela inn eit album”, sa han. Slik byrja samtalen mellom den cubanske pianisten Aruán Ortiz og den norske vokalisten Grete Skarpeid.

      sundag 24. mars

      13:00

    • Badnajazz: Hala og pappa, med Rasmus Rhode og Marte Valle

      På veg heim i romskipet sitt må Hala og Pappa nødlanda på ein framand planet. Her er alt ukjend, og dei er både redde og engstelege i møte med trolla som bur der.

      sundag 24. mars

      13:00

    • Eldrejazz: Mjøs/Sørheim/Wolski Trio med Kjartan Fløgstad

      Det vert slåttar frå Hardanger, Voss og ein smak av England når Mjøs/Sørheim/Wolski Trio kjem til Trudvang for å spela på Eldrejazzen. Musikarane opnar døra til si musikalske leikegrind, kor dei saman skapar eit innbydande musikalsk landskap av durspel, hardingfele og siter. Mellom musikken vert det opplesing av Kjartan Fløgstad.

      sundag 24. mars

      14:00

    • Maridalen

      Ut av den varme klangen av kontrabass, saksofon og trompet, dyrkar Maridalen lyden av det akustiske. Trioen hentar namnet sitt frå det naturskjønne dalføret like nord for Oslo sentrum, og musikken dei spelar ser ut til å likna landskapet sjølv. Dei levande tonane snor seg søkande avgarde – som den sprokne asfalten, og dei mange stiane, som snirklar seg innover dalen.

    • Karin Krog & The In Between Times

      Noregs Jazzdronning, Karin Krog, fekk Norsk jazzforums Hederspris i 2023 for over 65 år i jazzens teneste. Når ho i år kjem til Voss saman med gitarist Staffan William-Olsson og bassist Terje Gewelt er det ein høgt akta og mykje prislova trio som entrar scena.

    • AUROM TRIO m/ Per Jørgensen

      Folkesongarane i Aurom skal leika seg mellom det nye og det gamle i Vangskyrkja. Dei tre vokalistane brukar tradisjonssongar, nye songar, og sjeldan finjustert samklang til å skapa sitt tidlause musikalske uttrykk. Det er alltid eit snev av improvisasjon i musikken deira, som hentar stemninga si frå spennet mellom det stille og skjøre, og det intense og ekspressive. 

      sundag 24. mars

      17:00

    • Bergen Big Band med Shannon Mowday – «Colourful Houses»

      Shannon Mowday er eit fyrverkeri av ein musikar, og vil saman med det alltid vitale Bergen Big Band stå for ei kraftsalve utan like. Mowday sitt verk for BBB har fått tittelen “Colourful Houses”, og trekk trådar frå dei fargerike husa på Bryggen i Bergen, til det minst like fargesprakande området Bo-Kaap i Cape Town, der ho sjølv vaks opp. Begge stadane har vore viktige handelshamner, kor både musikken og kulturen har vorte forma av dei mange inntrykka og innflytelsane handelskulturen har ført med seg.

      sundag 24. mars

      18:00

    • ARAS

      “Aras” er resultatet når to av verdas fremste ensemble innan verdsmusikk slår seg saman: Javid Afsari Rad Ensemble og Zarbang Percussion Ensemble. Eit samarbeid som i sin intermusikalske natur passande nok er oppkalt etter elva som renn mellom Iran og Aserbajdsjan.