Tenorsaksofonist Hanna Paulsberg er sjeldan vare. Uansett kva konstellasjon ho opptrer i, sit ein att med kjensla av å ha vore vitne til ein sterk og kreativ musikar, med sterke band til norsk og internasjonal jazzhistorie.
Utanom det faste bandet Hanna Paulsberg Concept, har ho dei siste åra òg gjort seg bemerka i samarbeid med Bobo Stenson, Bugge Wesseltoft og i Spellemanns-vinnande GURLS.
I 2018 slapp Hanna Paulsberg Concept si fjerde plate – Daughter of the Sun – denne gongen med den svenske stjernetrompetisten Magnus Broo med på laget. Albumet fekk strålande mottaking, hausta lovord i nasjonal og internasjonal musikkpresse og vart nominert til Spellemann i kategorien jazz.
Hanna Paulsberg Concept har spelt saman i snart ti år, og har lenge vore på utkikk etter ein femtemann som kunne gli saumlaust inn i den svært samspelte gruppa, og samstundes «pusha» kvartetten til å gå nye veger og nå nye høgder. Valet fall på Magnus Broo, kjend frå Atomic og Angles 9 – med han vart det full klaff frå fyrste tone. Han har ei djup forståing av den afroamerikanske jazztradisjonen, og har ei unik evne til å tøye grenser og utforske nye musikalske landskap.
Hanna Paulsberg – saksofon
Magnus Broo – trompet
Oscar Grönberg – piano
Trygve Waldemar Fiske – bass
Hans Hulbækmo – trommer
Konserten inngår i billetten Huskort laurdag. Du kan ikkje kjøpa billett til berre denne konserten.
