Bergen Big Band med Bates og andre begava britar byrja sundagen med å blåse opp til stiv kuling i Gamlekinoen. Ein ivrig Bates på keyboard var oppe med armen og dirigerte resten av storbandet, saman med fløytespelaren Eddie Parker. Med to trommer, 4 trompetistar og trombonespelarar, og til saman 8 saksofonistar og fløyteblåsarar mangla det ikkje på djubde og trøkk frå scena. Django Bates var full av morosame historiar, gode titlar og artig scating sitjande på keyboardet sitt. Med ein god blanding av britisk ska-jazz og bergensk storband-swing kunne soloane gå på rundgang frå dei bakre blåsarane, via virtuose tangenttonar til gitaristen på scenekanten.

Då vossingen Elisabeth Lid Trøen fekk sin saksofon-solo, erstatta samtlige blåsarar sine instrument med eit muntert og laussluppent plystrekor.  Showet enda med blåsarane fråstorbandet gåande ned frå scena og ut i salen, og tilbake. “Om ein ikkje går frå konserten med eit smil om munnen bør ein gå til psykolog” fortalde artistverten før konserten, og ein kan trygt seie at det var eit smil om munnen på alle dei som reiste seg opp og applauderte.