laurdag 13. apr - TBA

Konserten inngår i billetten huskort laurdag. Du kan ikkje kjøpa billett til berre denne konserten.

Klump i halsen, gåsehud og hjartebank – dette er velkjende symptom for alle som er smitta av Jakob Bro-basillen. Den danske gitaristen har befesta sin posisjon innan toppsjiktet i jazzverda med lyrisk, underfundig spel og innovative, drøymande komposisjonar, både med den faste gruppa Jakob Bro Trio og i samarbeid med storleikar som Tomasz Stanko, Bill Frisell, Lee Konitz, Kenny Wheeler og Paul Motian. Bro sin umiskjennelege stil er like vakker som den er vanskeleg å beskriva: «Jakob Bro creates magical music, impossible to categorize», som Downbeat skreiv i ein omtale av albumet Streams frå 2016.

Jakob Bro nådde nye, magiske høgder på plata Returnings (ECM, 2018), saman med stjernelaget Palle Mikkelborg, Jon Christensen og Thomas Morgan. Albumet er ei oppvising i subtil, dynamisk musikalitet og meditative stemningar, med referansar til den stolte nordiske jazztradisjonen som Christensen og Mikkelborg er ein så viktig del av. Vossa Jazz er stolte over å få presentera denne fantastiske kvartetten på Voss i 2019.

(Ein spanande faktaopplysning på tampen: Sist gong pionerane Mikkelborg og Christensen spelte saman på ei ECM-utgjeving var faktisk på Terje Rypdal sitt Vossabrygg: Tingingsverket til Vossa Jazz 2003, som vart til plate i 2006!)

Jakob Bro – gitar
Palle Mikkelborg – trompet
Thomas Morgan – bass
Jon Christensen – trommer

Konserten inngår i billetten huskort laurdag. Du kan ikkje kjøpa billett til berre denne konserten.