– Det varmar hjarte å sjå at så mange har kome, smilte syriske Nawar Alnaddaf til ei fullsatt Vangskyrkje sundag ettermiddag. Med varme inviterte ho publikum inn i si rike musikalske verd, som blandar det arabiske og norske, det nye og gamle, – fletta saman av fantastiske improvisasjonar.
Det var meir enn repertoaret som gjorde denne solokonserten så variert. Alnaddaf trakterte både den arabiske fløyta ney, strengeinstrumentet oud, nyatiti (ei form for lyre), syngebolle og ikkje minst ei sterk og sjelfull røyst.
Den nydelege musikken hadde kjenslene til mange på brestepunktet, og då Alnaddaf heilt til slutt initierte allsong av «Vem kan segla förutan vind» måtte fleire gje etter for gråten. At dette var hennar fyrste fulle solokonsert for norsk publikum gjer, om mogeleg, denne meisterlege framføringa endå meir imponerande.
Symre Taugbøl Bang
