Opningskonserten starta tradisjonsrikt med filmintroen som viser mangfaldet på Voss, og mangfaldig skulle resten av opplevinga vise seg å bli. Dei som har vore med på opningskonserten før, veit å glede seg til det Trude Storheim kallar «Hymne til Vossa Jazz» – det nydelege stykket komponert av Per Indrehus.
Vidare leverte Erlend O. Nødtvedt ei intens og engasjerande framføring av det spesialskrive diktet sitt som knytte saman jazzen og jøsnahallingen.
Publikum vart så forflytta til Afrika og Zimbabwe av Busi Ncube og kompani, med ei urframføring av verket Usiko. Vi fekk oppleve ein rik musikktradisjon framført med innleving og entusiasme. Bandet var stødig, Busi var myndig og saksofonisten var mystisk. Dei suggererande rytmane gjorde det livleg i Vossasalen, og spesielt livleg var det på scenen der dei herleg koristane/dansarane sette standarden for resten av kvelden.