ERLEND APNESETH ENSEMBLE
Supergruppe og kritikarfavoritt i Gamlekinoen fredag 11. april!
Erlend Apneseth – hardingfele
Mats Eilertsen – kontrabass
Rolf-Erik Nystrøm – saksofon
Frode Haltli – akkordion
Anja Lauvdal – trøorgel, synth
Veslemøy Narvesen – trommer / perkusjon
Hans Hulbækmo – trommer / perkusjon
Henriette Eilertsen – fløyter
Helga Myhr – hardingfele, vokal
Rasmus Kjorstad – hardingfele, vokal, fele, oktafele
Selma French Bolstad – hardingfele, vokal
Thorolf Thuestad – lyd
Hardingfelespelaren Erlend Apneseth har med sin særeigne spelestil, ei lang rekkje kritikarroste Hubro-utgjevingar og utforskande musikalske samarbeid prestert kunststykket å bli både publikums og kritikarar sin favoritt både i folkemusikken, jazzen og nymusikken si verd. Hans nyaste album, «Song over Støv», vert sleppt på Hubro 4. april, og bandet han har sett saman for dette høvet må seiast å vere noko av ei supergruppe, beståande av nokre av dei mest tonegjevande musikarane på den norske musikkscena i dag.
Gjennom eit rått og vakkert samspel utforskar Apneseth og ensemblet hans omgrepet «verdsmusikk», med utgangspunkt i hardingfela og alle moglegheitene som bur i henne. Slik landskap og dalføre glir nesten umerkeleg over i kvarandre, er det tynne liner som skil stilartar og tradisjonar. Det skal berre ørsmå endringar til før du er på ein heilt annan stad. Denne gråsona er Apneseth sitt rike.